Gianunsyo sa mga organizers sa Miss Universe Philippines (MUPH) 2025 ang petsa sa gipaabot nga coronation night nga ipahigayon karong Mayo 2, 2025 sugod alas 6 sa gabii sa usa ka sikat nga mall sa Pasay City.
Samtang ang mga detalye sa pagpalit sa tickets kay ipagawas sa umaabot nga mga adlaw, sumala sa usa ka post sa social media sa MUPH kaniadtong Huwebes, Marso 13.
Ang edisyon karong tuiga sa MUPH gihulagway nga ‘Puksuan’ tungod sa mga kanhing reyna nga misalmot ug giisip nga lig-on. Gawas sa bag-ong mga nawong, ang kasamtangang batch naglakip sa mga seasoned beauty queen sama nila ni Reina Hispanoamericana 2017 Winwyn Marquez, Miss Earth Air 2023 Yllana Aduana, Miss International 2018 first runner-up Athisa Manalo, ug kanhi Binibining Pilipinas Globe Chelsea Fernandez.
Samtang, si kanhi 2013 Miss Universe 3rd Runner up Ariela Arida maoy mangulo sa MUPH 2025 isip bag-ong National Director, hulip kang Shamcey Supsup.
Naghinamhinam na ang mga tigpaluyo sa umaabot nga kalihokan, ug taas ang mga gilauman alang sa usa ka kulbahinam nga kompetisyon sa labing sikat nga indigay sa katahum sa kalibutan.
