CEBU CITY-Gipusil-patay ang usa ka pulis nga natangtang sa serbisyo sa Sitio Lupa, Purok Lower 3, Back Harolds, Barangay Kamputhaw, dakbayan sa Sugbo, gabii sa Domingo, Hulyo 23, 2023.
Giila ang biktima nga si Aaron Estarte, 41, residente sa Sitio Care, Purok 8 sa nahisgutang barangay.
Matod ni Police Staff Sergeant Joel Lamela sa Abellana Police Station 2, si Estarte gipusil sa likod nga bahin sa iyang ulo ug milapos ang bala sa iyang agtang.
Hinungdan nga namatay diha-diha dayun si Estarte.
Misibat human sa insidente ang gunman ug laing duha pa ka kauban niini nga nagsul-ob og itom nga t-shirt.
Ang live-in partner sa biktima nga si Roxanne Labra, niingon sa interbyu sa media nga si Estarte nangayo kaniyag permiso nga molakaw kadiyot aron i-park ang iyang motorsiklo apan wala siya niingon nga paingon siya sa Purok Lower 3.
Nasayran nga si Estarte adunay live-in partner nga si Roxanne Labra kinsa nagpuyo sulod sa duha ka tuig ug adunay usa ka anak.
Matud pa ni Police Lieutenant Colonel Janette Rafter, kasamtangang Deputy City Director for Operation sa Cebu City Police Office, nga si Estarte nahimong polis niadtong 2010.
Ang iyang kataposang assignment kay sa Regional Mobile Force Battalion sa Central Visayas (RMFB 7) niadtong 2017.
Apan, gitaktak siya sa serbisyo sa samang tuig human masikop sa anti-illegal drug operation.
Niadtong Marso 2021, gipagawas siya sa prisohan ug nagtrabaho isip security guard sukad niadto.
