Padayon nga nag-abutay ang tabang alang sa Venezuela gikan sa nagkalain-laing mga nasud human sa duha ka sunod-sunod nga kusog nga linog.
Ang Estados Unidos ang nanguna sa pagpadala og tabang, pinaagi sa pagpadala sa mga elite rescue team, medical resources, ug humanitarian assistance, diin gipahibalo usab sa US State Department ang alokasyon nga $150 milyon nga tabang, samtang ang US Military nag-assign sa mga pwersa niini sa rehiyon, lakip ang amphibious transport ship nga USS Fort Lauderdale ug transport aircraft, aron suportahan ang mga relief operation.
Nihimo usab ang ubang mga nasud ug organisasyo og dinaliang aksyon, diin ang United Nations ang nag-coordinate alang sa dinaliang pagpadala sa mga urban search-and-rescue team.
Samtang ang Colombia magpadala og humanitarian aid, lakip ang kapin sa 60 ka rescuer ug upat ka search dog.
Adunay 300 ka rescuer ug paramedic usab ang El Salvador, dugang sa 50 metric tons nga tambal ug mga kinahanglanon nga suplay. Samtang ang Chile, magpadala og espesyalisadong urban search and rescue unit gikan sa fire department niini.
Gikumpirma sab ni Cuban President Miguel Diaz-Canel nga ang ilang mga health personnel aktibo nga nagtabang sa pag-atiman sa mga biktima.
Milupad usab ang specialized personnel gikan sa Dominican Republic paingon sa Venezuela dala ang mga emergency supply.
Gibana-banang $113,700 usab ang ipala ni Pope Leo XIV isip initial aid package.
Samtang, ang mga nasud sa Panama, Spain, Mexico, France, ug Japan nagpadala usab sa ilang kaugalingong mga rescue team ug tabang, ug ang European Union, Iran, ug China nagpahayag sa ilang kaandam sa pagtabang.
