CENTRAL VISAYAS-Nadakpan sa usa ka police nga nadestino sa dakbayan sa Mandaue didto sa Barangay Tungkil lungsod sa Minglanilla ang usa ka lalake nga nanulis og motor sa lungsod sa Argao human mihapit sa pagpanulis sa dakbayan sa Naga.
Ang suspetsado giila nga si Barkley Caparida, 25-anyos nga taga Sitio Lagang, Barangay Bolinawan sa dakbayan sa Carcar.
Sa imbestigasyon sa Argao police station ang biktima nga si Sheena May Villamora, 32-anyos dalaga nga taga Barangay Talaytay lungsod sa Argao sakay sa bus gikan sa dakbayan sa Sugbo paingon na mopauli.
Naabot siya sa Argao alas 11 na sa gabii ug sa iyang pagkanaog sa lungsod iyang giadto ang iyang itom nga Honda Click nga motorsiklo nga iyang giparking sa usa ka gasoline station sa National Highway sa Barangay Langtad.
Iya ning gipadagan padung na mopauli sa Barangay Talaytay apan dunay laing motor nga iyang gihulagway nga kagang-kagang na nga gi maneho sa usa ka lalake nga naka itom og jacket mipaingon sa iyang nahimutangan ug kalit lang kini nga nanion og armas.
Tungod niini nahadlok ang biktima sa iyang nakita nga armas nga maoy hinungdan nga iyang nabangga-an ang motor sa suspetsado nga mi resulta sa ilang pagka tumba.
Apan ang suspetsado mibangon ug gikuha niini ang motor sa biktima nga natumba ug gibilin ang iyang karaan nga motor dayong pasutoy sa pagpadagan paingon sa Carcar.
Dali nga nangayog pakitabang ang biktima ug mipahibawo sa mga tawo sa lugar nga gikawat ang iyang motorsiklo.
Ang mga police nga mi responde mihimo gilayon og manhunt operation ug gipang contact ang mga silingang syudad ug lungsod nga mga police stations aron mababagan ang suspetsado.
Pag abot sa dakbayan sa Naga nanglabni diay ang suspetsado og cellular phone nga maoy hinungdan nga gigukod na usab siya sa mga police sa maong syudad hangtod nga naabot siya sa Minglanilla.
Tungod sa padayon nga paggukod kaniya misulod siya sa karsada paingon sa Sitio Sto. Niño Barangay Tungkil sa lungsod sa Minglanilla ug nangayog pakitabang kay matod pa dunay nag gukod kaniya.
Naatol usab nga adunay police sa lugar nga nadestino sa dakbayan sa Mandaue nga si Police Corporal Leonard Garrett Gako, 31-anyos ug mipaubos og interogasyon sa suspect kon unsa ka tinuod nga dunay naggukod niya.
Tungod kay wala magkadimao ang pamahayag niini gidala siya sa Minglanilla police station ug gipaubos sa imbestigasyon.
Sa dihang gipapangayoan siyag papeles sa iyang motor nga gi maneho wala kini ikapakita nga maoy hinungdan nga nakig-alayon sila sa Argao police station kung mao ba kini ang ilang gipa alarma nga nanguhag motor sa maong lungsod.
Sa dihang mitakdo sa pag hulagway ang motor nga gikawat niini gi kuha kini sa mga personnel sa Argao police station alas 4 sa Biyernes sa buntag Hulyo 7, 2023 ug gidala pagbalik sa maong lungsod ug positibong giila sa biktima ang maong suspetsado.
