Mihimo og kasaysayan ang 17-anyos nga Pilipinang runner nga si Naomi Marjorie Cesar human kini makasakmit og silver medal sa Youth Olympic Games niining Martes, oras sa Manila.
Kini ang unang medalya nga nakuha sa Pilipinas sa kasaysayan sa maong kompetisyon.
Natapos ni Cesar ang 800-meter run sa oras nga 2 minutos ug 9.34 segundos, nga mipahiluna kaniya sa ikaduhang pwesto ug nakasiguro sa silver medal.
Samtang, nakuha sa Moroccan runner nga si Khadija Elmostaqim ang bronze medal human motabok sa finish line sa oras nga 2 minutos ug 10.05 segundos.
Ang gold medal naman nasakmit sa taga-Ethiopia nga si Netsanet Selemon, nga nakarekord og personal best nga 2 minutos ug 4.43 segundos.
Kahinumdoman nga si Cesar nahimong pinakabatang atleta nga nakadaog og gold medal sa 800-meter run atol sa Southeast Asian Games nga gipahigayon sa Bangkok niadtong Disyembre 2025.
Sa samang tuig, nakalangkat usab siya og silver medal sa Asian Youth Games sa Bahrain, nga dugang nagpasiugda sa iyang talento ug potensiyal sa natad sa long-distance running.
