Nakurat ang mga organizers sa National Bank Open sa Canada sa kapaspas sa pagkahurot sa mga tiket alang sa mga duwa sa Filipina tennis star nga si Alex Eala.
Sumala ni Karl Hale, tournament director sa WTA 1000 event, wala nila damha ang pagdagsa sa mga Filipino fans nga misuporta sa duwa ni Eala batok sa Amerikanang tennis player nga si Alycia Parks niadtong Huwebes, Agosto 6.
Sa maong duwa, midaog si Eala sa iskor nga 6-1, 4-6, 6-2 aron makaabante sa ikatulong hugna sa torneyo.
Agig tubag sa dakong suporta sa mga Filipino fans, nagtanyag ang mga organizers og adobo chicken sa food court sa Sobey’s Stadium, nga adunay kapasidad nga 10,077 ka mga lingkoranan.
Matud pa ni Hale, kini ang unang higayon nga adunay espesyal nga pagkaon nga gidugang sa tunga-tunga sa usa ka torneyo tungod lamang sa usa ka magduduwa.
Giisip sa mga organizers ang mainit nga suporta alang kang Eala isip usa ka pamatuod sa kalig-on ug pagkahiusa sa komunidad sa mga Pilipino sa Canada.
Ang nagkadakong kasikat ug kalampusan ni Eala nakahatag og talagsaong kolor sa maong torneyo, nga karon mas nailhan dili lamang sa world-class nga kompetisyon sa tennis kondili usab sa pagpakita ug pagsaulog sa kulturang Pilipino.
