CEBU CITY-Gi-awhag ni Maurice Jitty Villaester kinsang Public and Media Relations Officer sa LoveYourself, Cebu ang publiko nga mutambong ug mupaubos sa National HIV testing karong adlaw nga Sabado alas 11 sa buntag hangtud sa alas 7 sa gabii.
Kini agi ug subay sa ilang kawsa sa pakigbatok sa sakit nga HIV kung diin hitak na sa Central Visayas.Nasayran nga ang Central Visayas ang ika 9 sa tibook Pilipinas nga dunay taas nga kaso sa HIV kung diin dunay 6,060 ka mga indibidwal ang na-diagnose niini.
Gipangulohan ang maong libre nga test sa LoveYourself kansang usa ka community-based organization nga nahimutang sa nagkadaiyang area sa nasud nga nagtumong nga mahatagan og libre nga testing, counseling ug awareness programs ang publiko kalabot sa Human Immunodeficiency Virus (HIV) ug ilabina kadtong nataptan na niining maong sakit.
Sa pakighinabi sa Bombo Radyo Cebu kang Villaester gitino niini nga, ang pagpaubos sa screening dili angayan ikahadlok ug ika-uwaw sanglit dako kining tabang sa kaugalingon. Mas maayo usab matud pa nga sayo madetect ang virus sa lawas aron nga dali kini nga matambalan.
Importante usab matud pa nga masayran sa publiko nga ang sakit nga HIV sama ra kini sa sakit nga dunay imnon nga tambal isip maintenance, aron nga dili hingpit nga mamahimong huyang ang ‘immune system’ hinungdan nga mupaubos gyud sa screening matag 3 ka buwan.
Gipasabot usab niini nga, duna’y mga ‘life coach’ sa ilang center nga maoy mutabang sa mga People Living with HIV/AIDS (PLWHA) aron sa pagdawat sa ilang bagong status ug sa angayan nilang agi-an nga mga proseso.
Samtang ang kadtong nagduha-duha o mahadlok pa mupascreening, ang ma-edukar usab kung muadto kini sa ilang center atol sa libreng testing.
Ipahigayon ang screening sa LoveYourself White House sa dakbayan sa Sugbo, sa Sunflower KTV, Parkmall sa Mandaue City, Watever KTV, The Outlets sa Lapu-lapu City ug sa Brgy. Poblacion Park sa Talisay City.
Sa mga boot magpa-screening, mamahimong makuha dayon ang resulta human lamang sa 15 minutos ug duna usab kini libre nga condom.
