CEBU – Gi-ronda sa National Bureau of Investigation Central Visayas (NBI 7) ang usa ka kompanya nga nakabase sa Sugbo tungod sa giingong paggamit sa customized application sa Japan-based partner niini nga walay pagtugot sa naulahi.
Kini nahitabu niadtong Huwebes, Nob. 17, 2022, kung diin gironda sa mga operatiba sa NBI 7 ang mga pasilidad sa Aquarius System Inc. sa Cebu I.T. Park sa Barangay Apas, dakbayan sa Sugbo, pinaagi sa search warrant nga giisyu ni Judge Ramon Daomilas sa Regional Trial Court Branch 11 sa dakbayan sa Sugbo.
Ang search warrant giaprobahan ni Daomilas niadtong Nobiyembre 15.
Nasakmit atol sa operasyon ang daghang computer units, laptops, removable storage media, servers ug routers.
Walay nasikop atol sa pag-serve sa search warrant, matod sa NBI 7.
