MANDAUE CITY-Nagpahigayon ug press conference karong adlawa sa Miyerkules Hunyo 26, 2024 ang buhatan sa National Bureau of Investigation Cebu District Office (NBI-CEBDO) kabahin sa 2-ka spa ug 1-ka KTV bar sa dakbayan sa Mandaue nga gironda niini niadtong milabay nga Biyernes Hunyo 21.
Nahitabo ang pagronda didto sa dalan AS Fortuna, Brgy Banilad, ning dakbayan sa Mandaue.
Nakaluwas sa labing menos 20-ka mga babaye ang mga tinugyanan sa balaod, kinsa biktima sa human trafficking, gikan sa usa ka establisemento nga giingong nagtanyag og adult o extra nga serbisyo.
Basi sa imbestigasyon sa mga awtoridad nga niadto pang buwan sa Disyembre 2023 nag sugod ilang mga operatiba sa pagsusi sa maong mga balay-kalingawan sa naasoy nga dakbayan.
Atol sa nahitabong pagpangronda, ang mga undercover agents sa NBI-CEBDO nakigsabot nga dunay duha ka customer care assistant aron manihapon ug moadto sa usa ka motel.
Human mabayri ang duha ka mga babayeng empleyado, gidala na hinuon sila sa mga enforcer sa duol nga safehouse diin gi-debrief sila sa mga social workers sa Department of Social Welfare and Development (DSWD).
Unya ang ubang mga ahente misulod sa bar, ug giluwas ang 18 pa ka mga empleyado gikan sa establisemento.
Nipasaka na og kaso ANG NBI-CEBDO nga Trafficking in Persons batok sa mga nagpadagan sa maong mga balay-kalingawan.
