Giinsistir ni National Bureau of Investigation (NBI) Director Melvin Matibag nga ang warrant of arrest sa International Criminal Court (ICC) batok kang Senador Ronald dela Rosa nagpabilin nga balido bisan pa sa usa ka pending nga petisyon sa Korte Suprema aron babagan ang warrant.
Sumala ni Matibag, naminaw sila sa Korte Suprema apan matod niya klaro nga ang warrant sa ICC, nga gikumpirma sa publiko sa miaging semana, balido gihapon.
Gisulayan sa NBI nga ipatuman ang warrant niadtong Mayo 11 apan gibutang sa Senado si dela Rosa sa “protective custody” busa miatras ang ahensya tungod kay giingong gitahod nila kini.
Samtang, ang Department of the Interior and Local Government (DILG) miingon nga naghulat sila sa desisyon sa Korte Suprema sa dili pa molihok sa warrant.
Kahinumduman nga giisip na sa ICC si dela Rosa nga usa ka “co-perpetrator” sa gubat ni kanhi Presidente Rodrigo Duterte batok sa droga nga giingong nakapatay og liboan ka mga indibidwal.
Ang kampo sa senador nagsang-at og daghang urgent motions sa Korte Suprema, lakip ang paghunong sa pagpatuman sa warrant sa ICC.
