Gibutang sa heightened alert ang National Disaster Risk Reduction and Management Council (NDRRMC) ug ang 44 niini ka miyembro nga ahensya isip pagpangandam sa posibleng epekto sa Super Typhoon Bavi nga anaa pa sa gawas sa Philippine Area of Responsibility (PAR).
Base sa forecast sa state weather bureau, gilauman nga mosulod ang maong super typhoon sa PAR sa Martes sa gabii o sayo sa Miyerkules sa buntag ug tawagon kini og bagyong Inday.
Matod ni Office of the Civil Defense (OCD) Administrator Assistant Secretary Bernardo Rafaelito Alejandro IV, padayon nilang gibantayan ang lihok sa bagyo sukad pa sa miaging semana ug gimandoan na ang mga ahensya nga mangandam.
Gimonitor usab sa NDRRMC ang epekto sa kusog nga habagat o southwest monsoon nga nagdala og kusog nga ulan sa kasadpang bahin sa Luzon, gikan sa Rehiyon 1 hangtod Rehiyon 4B, ilabi na sa Palawan.
Samtang, nagbutang usab sa taas nga alerto ang Department of Social Welfare and Development (DSWD) sa mga disaster response unit niini alang sa posibleng epekto sa bagyo.
Giandam usab sa ahensya ang kapin 4.775 milyon ka family food packs nga ipang-apod-apod kung gikinahanglan sa mga lugar nga maapektuhan.
