Nakatala ang Bulkang Kanlaon og laing pagbuto nga adunay kasarangan nga kusog, sumala sa mga taho ug obserbasyon sa mga awtoridad.
Tin-aw nga nakita ang pagbuto gikan sa Barangay Lalagsan sa lungsod sa La Castellana, Negros Occidental, diin nakuhaan og mga litrato sa mga residente ang maong panghitabo.
Sumala sa pasiunang mga pahibalo, nagsugod ang kalihokan sa bulkan sa alas 12:46 sa udto gahapong adlawa, ug opisyal nga natapos ang pagbuto sa wala pa moabot ang alas 1:00 sa hapon.
Sa pagkakaron, padayon ang National Disaster Risk Reduction and Management Council (NDRRMC) ug DOST-PHIVOLCS sa pagpahinumdom sa publiko nga magpabiling alerto, mag-amping, ug mosunod sa mga protocol sa kaluwasan kalabot sa posibleng pag-ulan sa abo o dugang nga kalihokan sa bulkan.
