CENTRAL VISAYAS-Gikasubo sa kadagkuan sa National Food Authority (NFA) 7 nga wala na sila’y gahom nga makatabang sa mga kunsomidor karung panahon nga hilabihan ang pagsaka sa presyo sa bugas.
Gipasabot ni Maria Fe Evasco, ang NFA 7 Regional Director, nga sukad napasar ang Republic Act 11203 o Rice Tarrification Law niadtong Pebrero 2019, giwagtang na ang stabilization ug regulatory function sa ahensya.
Matud pa, dili susama kaniadto nga makapamaligya ang ahensya og NFA rice sa mga accredited retailers diin direkta nga makapalit ang mga kunsomidor og barato nga bugas.
Gitino ni Evasco nga ang NFA karun kay gihimo na lang nga usa ka “buffer stocking agency” diin ang ahensya mopalit og humay gikan sa lokal nga mga mag-uuma ug mao kini ang gamiton panahon nga adunay kalamidad o emerhensiya pinaagi sa Department of Social Welfare and Development (DSWD).
Una ang pagpasar sa Rice Tarrification Law, ang private sector ug national government kay maka-importar og bugas pinaagi sa NFA, apan karun gitangtangan na og gahom ang ahensya sa maong lakang.
Sa karun, giingong ang private sector na ang muhimo sa importation ug ang pagpamaligya sa mga kamerkadohan.
