CEBU – Gitataw ni Atty. Jocelyn “Joy” Pesquera , ang Manager sa New Oasis for Adaptation and Home (NOAH) Complex nga andam na ang team niini kung ugaling himuong vaccination site ang maong quarantine facility.
Matod ni Pesquera nga maghuwat nalang kini nga magpirmahanay og kontrata ang Cebu City Government nga gipangulohan ni Cebu City Mayor Edgardo Labella ug ang BigFoot nga maoy tag-iya sa edispisyo. Dugang pa niini nga kung ma-convert na kini isip vaccination site, makabakuna kini og kapin 1,000 ka mga indibidwal matag adlaw gumikan kay dako man kini og luna.
Mas maayo matod pa kini tungod kay mupaspas na ang vaccination rollout sa dakbayan sa Sugbo ilabi na nga adunay expiration ang mga Covid-19 vaccine. Gibutyag usab niini nga kung hingpit na nga mahimong vaccination site ang NOAH Complex, dili usab angayang mabalaka ang publiko sa distansya niini ug ang kanihit sa sakyanang pang transportasyon tungod kay motagana matod pa kini og mga sakyanan nga mu pick-up sa mga indibidwal nga buot mabakunahan.
Samtang nagkanayon usab si Pesquera nga wala nagkuwag og vaccination team ang Syudad sa Sugbo tungod sa daghang mga niboluntaryo nga muserbisyo.
