Gitaho sa South Korean Defense Intelligence Agency (DIA) nga ang North Korea nagpadayon sa pagpadala sa mga artillery shells ngadto sa Russia sukad sa pagsugod sa gubat sa Ukraine.
Sumala sa DIA, ang Pyongyang nagpadala og labaw pa sa 28,000 ka mga sudlanan sa artillery shells ug uban pang mga bala sa Russia – katumbas sa gibanabana nga 12 milyon nga 152mm artillery rounds.
Basi usab sa usa ka taho sa Bloomberg, ang North Korea wala lamang nagpadala sa mga bala gumikan milapad nasab ang suporta sa militar sa Pyongyang, lakip ang pagpadala sa mga missile, self-propelled guns, ug mga military combat.
Una niini, si Kyrylo Budanov, pangu sa Ukrainian military intelligence, diin nagpadayag nga ang North Korea mahimong nagsuplay sa 40% sa mga kinahanglanon sa bala sa Russia.
Gawas sa mga armas, ang North Korea gikataho nga nagsugod na usab sa pagpadala og mga tropa ug mga eksperto sa militar.
Kahinumduman nga sukad niadtong Oktubre 2024, ang Pyongyang nagpadala na og gibanabanang 13,000 ka mga sundalo aron motabang sa Russia. Gilauman usab nga magpadala ug 5,000 ka construction worker ug 1,000 ka military engineers (sappers) karong Hulyo o Agosto ngadto sa Kursk, sumala sa espiya nga ahensya sa South Korea.
Ang mga relasyon tali sa Russia ug North Korea nagpadayon sa pagpalalom taliwala sa kapeligrohan sa rehiyon, uban sa Russian Ministro nga si Sergei Lavrov bag-o lang mibisita sa Pyongyang, nga nagpamatuod sa suporta ni Kim Jong Un alang sa Kremlin.
Kapalit sa suporta, ang Russia giingon nga naghatag pinansyal nga tabang ug teknolohiya sa North Korea, nga nagtabang sa rehimen ni Kim nga makunhuran ang epekto sa “internasyonal nga pagkahimulag.”
