CEBU CITY- Mibutyag si Jupid Cambarihan Cañete, ang Bombo International Correspondent sa Czech Republic, nga wala pa’y migawas nga balita didto bahin sa giingong pagkasikop ni kanhi Representative Elizaldy “Zaldy” Co, nga gitudlo nga usa sa mga utok ug kabahin sa Flood Control Project anomalies lakip na ang budget insertions.
Sumala ni Cañete, wala pa’y report nga migawas gikan sa mga lokal nga news outlet sa Czech Republic kabahin niini, ug naghulat pa sila og opisyal nga kumpirmasyon gikan sa mga awtoridad.
Dugang pa niya, nalipay siya ug ang iyang mga kauban sa trabaho sa ilang pagkahibalo sa maong impormasyon nga giingong nasikop na ang maong pugante, tungod kay usa usab siya sa nagmonitor sa isyu sa flood control projects.
Matud pa ni Cañete, sa dihang ilang nabasahan ang balita—nga giingong gikan usab kang Presidente Ferdinand Marcos Jr.—murag naibanan sila og kabalaka tungod sa maong impormasyon.
Gipasiugda usab niya nga, subay sa maong isyu, kinahanglan gyud nga adunay manubag sa giingong pagpangawkaw sa kwarta sa katawhan, ug angayan lamang nga bayaran kini ni Zaldy Co pinaagi sa pag-atubang sa hustisya.
