Gipasiugda sa Office of the Ombudsman nga dili kini maimpluwensyahan sa mga aksyon o lakang nga gihimo ni kanhi Ako Bicol Party-list Rep. Zaldy Co.
Sumala ni Assistant Ombudsman Mico F. Clavano, nga dili sila maapektuhan sa gitawag nga ‘dilatory tactics’ sa iyang kampo sa lawom nga imbestigasyon batok sa korapsyon.
Kini human si Co nagsang-at og petisyon sa Korte Suprema aron mangayo og TRO o Temporary Restraining Order aron mahunong ang pagpatuman sa resolusyon sa Office of the Ombudsman.
Hilabi na ang kaso sa graft ug malversation nga girekomendar sa Tanod-Bayan nga ipasaka isip kaso sa Sandiganbayan.
Giangkon sa kanhing magbabalaod nga ang iyang katungod sa due process nalapas tungod kay wala siya gihatagan og notisya nga magsang-at og counter-statement.
Bisan pa niini, gipadayon sa Office of the Ombudsman nga dili sila maimpluwensyahan sa mga taktika nga makapahinay lang sa imbestigasyon batok sa iyang ilegal ug kurakot nga mga kalihokan.
Dugang nga gipaambit ni Assistant Ombudsman Clavano nga magpabilin silang naka-focus sa pag-imbestiga batok sa korapsyon.
