Masaligon si Ombudsman Jesus Crispin Remulla nga si Senador Loren Legarda ug ang iyang anak nga si Batangas Rep. Leandro Leviste, mobalik sa Pilipinas human sila mobiya sa nasud samtang nag-atubang sa imbestigasyon sa Office of the Ombudsman.
Kalambigitan sa mga reklamo sa plunder ug graft batok kang Leviste ug sa iyang kompanya sa renewable energy.
Sumala ni Remulla, nagtuo siya nga ang inahan ug anak mobalik sa nasud. Apan nagpasidaan siya nga mahimo silang mag-atubang og legal nga aksyon kung dili sila mobalik.
“Baka gusto nilang umuwi na nakaposas ‘pag hindi sila, bumalik, hindi ba?” matod ni Remulla.
Samtang, giklaro ni Senador Loren Legarda nga ang iyang pagbiya sa nasud kabahin sa naaprobahan na nga medical leave gikan Agosto 3 hangtod 5, subay sa mga lagda sa Senado.
Gihangyo usab niya ang publiko nga dili i-link ang iyang biyahe sa iyang giingon nga walay basehan nga mga alegasyon batok kaniya.
“I ask the public not to draw unwarranted conclusions from my travel or link it to the recent false and baseless allegations, which undeservedly besmirch a reputation that I have built over decades of public service,” matod sa senador.
Ang National Bureau of Investigation (NBI) sa sayo pa miingon nga si Legarda mibiyahe sa France, samtang si Leviste unang miadto sa Hong Kong sa wala pa moadto sa France.
May kalabotan niini, ang Department of Energy nagsang-at usab og reklamo sa Department of Justice batok kang Leviste ug pipila ka mga opisyal sa Solar Para sa Bayan Corporation tungod sa giingong kapakyasan sa paghatag og kuryente sa mga hilit nga lugar sa nasud, sama sa giingon sa ilang prangkisa.
