Gikatakdang mopasaka ang Office of the Ombudsman og kasong plunder sa Sandiganbayan karong Lunes batok sa kanhing Speaker of the House ug kasamtangang Leyte 1st District Representative Martin Romualdez, may kalabotan sa iyang giingong kalambigitan sa mga iregularidad sa mga proyekto sa flood control.
Kini samtang nanawagan ang kampo ni Romualdez sa Ombudsman alang sa patas nga pagtratar ug hustong proseso, lakip ang paghatag kaniya og oportunidad nga makatubag sa bisan unsang bag-ong mga pasangil batok kaniya.
Ang iyang legal counsel ug spokesperson nga si Ade Fajardo nangayo usab og impormasyon bahin sa bisan unsang mga pasangil nga nalambigit sa kanhing Public Works Secretary Manuel Bonoan ug sa mga pahayag sa 28 ka bag-ong mga saksi.
Gipasiugda ni Fajardo nga ang patas nga proseso nagkinahanglan nga mahatagan si Romualdez og maong impormasyon ug higayon sa pagtubag niini sa sayong yugto pa lamang sa imbestigasyon, dili lamang human makadesisyon ang Ombudsman nga mopasaka og kaso sa korte.
Unang nalambigit si Romualdez sa giingong mga iregularidad sa flood control projects niadtong Septyembre 2025, human gibutyag sa mga kontraktor atol sa usa ka Senate hearing ang mga ngalan sa mga kongresista nga giingong nangayo og kickback.
Bisan pa sa pagbawi sa pipila sa mga naunang akusasyon, miinsister ang Office of the Ombudsman niadtong Agosto nga aduna pa kini og 28 ka mga saksi nga giingong adunay hinungdanong impormasyon bahin sa giingong kalambigitan ni Romualdez sa isyu sa flood control.
