Gilibkas sa Ombudsman ang mga restriksyon sa pag-isyu sa Statement of Assets, Liabilities, and Net Worth (SALN) sa mga opisyal sa gobyerno pinaagi sa Memorandum Circular 3 nga gipagawas niadtong Martes, Oktubre 14.
Matod sa Ombudsman, ang desisyon nagtumong sa pagpasiugda sa transparency isip usa ka panalipod batok sa korapsyon, tungod kay ang publiko adunay katungod nga mahibal-an kung giunsa pagbaton ug pagdumala sa mga opisyal ang ilang bahandi.
Mahimong masusi ug makopya ang SALNs, 10 ka adlaw human sa deadline sa pagsumitir gikan sa tanang ahensya sa gobyerno.
Kinahanglang isumiter ang hangyo sa Public Assistance and Corruption Prevention Office (PACPO) o Public Assistance and Corruption Prevention Bureau (PACPB).
Mahimo usab nga ipasaka ang reklamo sa Ombudsman Field Investigation Office (FIO) kung adunay ebidensya sa wala masaysay nga bahandi.
Ang ubang impormasyon tangtangon sa SALN sa dili pa kini ipagawas sa publiko, sama sa kompletong address sa hingtungdan, detalye sa menor de edad nga mga bata, pirma, ug ID number.
Dili usab ihatag ang SALN kung ang katuyoan alang sa komersyal nga paggamit o pag-impluwensya sa usa ka kaso.
