CEBU CITY-Gihimug-atan sa Office of the Presidential Assistant for the Visayas (OPAV) nga kaluwasan sa mga Sugbuanon ang gi-apas ning pagpaubos sa entero Cebu City sa general community quarantine (GCQ).
Matud ni OPAV Assistant Sec. Jonjie Gonzales nga gisuguro karon sa gobyerno ang luwas nga kahimtang sa mga trabahante nunot na sa hinay-hinay nga pagbangon sa nahagba nga ekonomiya. Kini mao ang pagpatuman sa “Project Balik Buhay” kung diin ipaubos sa COVID-19 testing ang mga empleyado sa Sugbo sa dili pa makatrabaho.
Siguruon karon, matud pa, sa OPAV ug sa uban pang mga ahensya sa gobyerno nga luwas ang mga trabahuan pinasubay usab sa mga health protocols. Sigon pa usab ni Gonzales nga nagtinabangay karon ang pribadong sektor ug local government unit aron kalikayan pa ang pagkuyanap og samot sa makamatay nga kagaw.
Sa laing bahin, mipadayag usab ang OPAV nga padayon ang pagsuporta sa gobyerno ngadto sa mga medical frontliners sanglit nakita niini ang pagpaningkamot.
Dason usab niini nga angayan nang tabangan sa mga ahensya sa gobyerno ang mga tawo kinsang na-stranded sa nagkalain-laing dagkong lugar aron makauli ngadto sa tagsa-tagsa ka mga probinsya. | GN
