CEBU CITY – Hatagan ug igu nga panahon ni Cebu City Mayor Edgardo Labella ang management sa Binaliw landfill sa pagpangita ug lain nga kalabayan sa mga basura.
Kini human nga gimanduan na sa mayor ang ARN Builders nga hunungon na ang pagdawat ug mga basura sa dihang nahasul na ang mga tawu sa Barangay Binaliw, ingun man ang mga kasikbit nga barangay, hilabi na niadtung maagi-an sa garbage truck.
Giklaru usab ni Mayor Labella nga ang naaprubahan sa City Council mao ang Material Recovery Facility (MRF), ug dili landfill.
Nasayran usab sa mayor nga dili lang lang dakbayan sa Sugbo ang naglabay ug basura sa Binaliw landfill, inay lakip na ang dakbayan sa Lapu-Lapu ug Mandaue hinungdan nga iyaha na kining gipahunung.
Hinu-un, gipadayag ni Labella nga mahimu man nga dili isiradu ang landfill kung himu-un kining MRF.
