CEBU CITY — Nasikop na ang gitudlong responsable sa pagpanlungkab sa Brgy Hall sa Basak San Nicolas ning syudad sa Sugbo.
Kini ang gikumpirmar ni Brgy. Councilor John Rama ang Chairman sa Peace and Order Committee.
Matod ni Councilor Rama nga usa ka brgy. tanod ang responsable diin naila kini nga si Franklin Jerad kinsa on-duty matod pa niadtong higayuna sa dihang nahitabo ang insidente.
Gi-angkon usab matod pa niini ang maong panghitabo diin gihimo niini matod pa nga hinungdan ang iyang asawa nga maningil gyud kaniya ug kwarta inig uli.
Matod sa opisyal nga nakita sa mga CCTV cameras sa brgy ang maong panghitabo ingon man ang bayhon mismo sa responsable.
Wala matod pa maablihi sa responsable ang vault sa Treasurer’s Office apan nakuha matod pa ang mga sinsilyo nga mokabat sa kapin P2,000.
Kahinumduman nga nasuta na lang ganinang buntag sa usa sa mga trabahante sa brgy. nga naguba na ang usa sa mga buhatan sa brgy hall gumikan sa pagpanlungkab.
