Gisugyot sa labor group Federation of Free Workers ang alokasyon sa P100 bilyon nga stimulus fund aron suportahan ang gagmay nga mga negosyo.
Diin gihimo ni Federation of Free Workers President Sonny Matula ang maong sugyot, dungan sa National Employment Summit nga gipasiugdahan sa Department of Labor and Employment.
Matod ni Matula, ang gahin nga P100 bilyones nga stimulus siguradong makamugna og dugang trabaho ug makapalambo sa ekonomiya sa nasod sa mosunod nga napulo ka tuig.
Dugang niini nga mahimo usab kini nga paagi aron masuportahan sa gobyerno ang hangyo sa mga mamumuo alang sa usbaw nga suholan.
Gipakita ni Matula ang Progressive Wage Model sa Singapore ug Workfare Income Supplement diin ang gobyerno niini nagsuporta sa mga kuwalipikadong negosyo pinaagi sa stimulus nga naghatag og dalan sa pagsaka usab sa suholan sa mga mamumuo.
Sa samang higayon, gisuportahan sa grupo sa mga mamumuo ang panawagan alang sa dugang 150 nga usbaw sa suholan sa mga mamumuo sa tibuok nasud.
Kung gani mahitabo kini, kapin sa 4 milyones ka trabahante sa pribadong sektor ang makabenepisyo niini.
