(Kuha ni Bombo Eric Amaro)
CEBU CITY – Nabalhog sa prisuhan ang usa ka high-value-target human kini nakuhaan og kapin P11-million nga balor sa drugas atol sa gipahigayong buybust operation sa Sitio Bayutan, Brgy. Duljo Fatima, sa dakbayan sa Sugbo.
Giila ang 23-anyos nga dinakpan nga si Richard Barbosa, alyas Butong, usa ka habalhabal driver, ug nagpuyo sa maong barangay.
Matud sa hepe sa Mambaling Police Station nga si Police Capt. Francis Renz Talosig, nga kapin usa ka buwan nang gipaubos sa surveillance si “Butong.”
Nasayran nga anaa sa dakbayan sa Sugbo ang area of distribution niini.
Dugang pa ni Talosig nga si Butong ang gituohang supplier sa suspek nga si Orsolino Alfafara, kinsang nakuhaan og minilyon nga balor sa shabu niadtong buwan sa Abril.
Nakuhaan si “Butong” og 1.6 ka kilo sa gidudahang shabu nga mikantidad og P11.4 million.
Gipaubos sa imbestigasyon ang dinakpan ug gikatakda kining pasakaan og kasong kalapasan sa Section 5 and 11 sa RA 9165 o Comprehensive Dangerous Drugs Act.
