CEBU CITY-Plano nga muhatag ug P2.5 million nga pondo ang kagamhanan sa probinsiya sa Sugbo sa matag lokal nga pangagamhanan sa probinsiya sa Sugbo alang sa pagtutok sa panglawas.
Gipahibalo ni Cebu Provincial Governor Gwendolyn nga niining panahon sa pandemya importante nga palig-unon pa ang immune system hayan nag-awhag kini ug healthy lifestyle sa mga Sugbuanon. Sa naasoy nga kantidad, lakip na niini ang giduso nga SUGBUsog Program o Sugbuanong Busog, Luwas ug Himsog, usa ka kompetisyon nga gilangkoban sa matag tagbalay, ingon man sa matag purok sa barangay.
Matud pa sa gobernadora nga ang maong kompetisyon ang mag-awhag sa katawhan sa probinsiya nga mananom ug utanon arun nga dili na kinahanglan nga mupalit, ug labaw sa tanan nag-awhag kini ug ‘healthy diet’ sa matag Sugbuanon.
Gidugang pa ni Garcia nga aduna na’y mga ‘municipal and cities awardees’ nga nadeklarar human sa gipahigayon nga evaluation.
Karung katapusan sa Agosto ideklarar usab ang Provincial Grand Champion sa SUGBUsog sa household ug purok category, uban usab sa mga district winners.
Lakip usab sa naasoy nga pondo ang pagpalit ug mga bitamina nga makatabang sa pagpalig-on sa immune system, ingon man mga air purifiers ug ultraviolet sterilizing lamps nga ipanghatag usab sa mga munisipyo, barangay halls ug uban pang mga opisina sa gobyerno sa matag local government unit (LGU).
Gipasabot ni Governor Garcia nga mensahe niini mao nga kinahanglan nga ampingan ug proteksyonan ang panglawas batok sa mga sakit ilabi na niining COVID-19 nga hangtud karun wala pa’y bakuna. | SBR
