CEBU CITY — Gibana-banang mokabat sa P2-milyones nga balor sa shabu ang nasakmit sa PNP gikan sa managlahing mga buybust operations sa dakbayan sa Sugbo.
Mag-atubang og kasong kalapasan sa Comprehensive Dangerous Drugs Act (RA 9165) ang giingong usa ka pig vendor human nakuhaan og kapin usa ka milyon ka pesos nga balor sa drugas atol sa buybust operation sa Brgy. Ermita sa susamang dakbayan.
Kini human nga gisikop sa mga sakop sa Carbon Police Station ang subject nga si Rolly Juros, alyas Esma, 21 anyos, ug residente sa maong lugar.
Matud sa team leader nga si Police Captain Alvin Llamedo sa Carbon PNP – Drug Enforcement Unit, nga usa ka high value target si Alyas Esma apan wala kini malakip sa ilang drug watchlist.
Nasakmit sa kapulisan ang 200 gramos sa gidudahang shabu nga adunay DDB value nga P1.3 million, usa ka keypad cellphone, ug usa ka diposable diaper.
Nabalhog ang dinakpan sa prisuhan sa Carbon Police Station samtang gi-asikaso sa PNP ang kasong ipasaka batok kaniya.
Samtang nasakmit usab sa mga sakop sa Labangon Police Station ang P700,000 nga balor sa shabu gikan sa tulo ka mga dinakpan sa Sitio Bliss, Brgy. Labangon, sa susamang dakbayan.
Matud ni Police Major Henrix Bancoleta nga nasikop sa maong operasyon ang mga anaa sa drug watchlist nga silang Lilibeth Navales, Lovely Joy Gomotong, ug usa ka street level target nga si Joemarie Suson.
Nakuha gikan sa ilang Drug Enforcement Unit ang 103 grams sa shabu gikan sa mga dinakpan.
