Nipasalig si Presidente Ferdinand R. Marcos Jr. sa publiko nga ang P20 matag kilo nga programa sa bugas sa gobyerno dili temporaryo ug sa dili madugay magamit na sa mas daghang merkado publiko sa tibuok nasud.
Sa iyang pinakaulahing vlog nga gipagawas, si Marcos miingon nga ang programa, nga gilusad pinaagi sa Kadiwa ng Pangulo outlets alang sa mga huyang nga sektor, kabahin sa mga paningkamot sa administrasyon sa paghatag og barato nga pagkaon ug pagpalig-on sa sektor sa agrikultura pinaagi sa padayon nga kolaborasyon tali sa nasyonal ug lokal nga gobyerno.
Diin gitawag niini ang inisyatiba nga “Benteng Bigas Meron na! (BBM)” maoy usa sa mga saad sa kampanya ni Marcos, nga gitumong sa pagpagaan sa palas-anon sa pagsaka sa presyo sa pagkaon.
Ingon man nga sa pagkakaron anaa na sa mga senior citizens, solo parents, persons with disabilities, indigent families, ug minimum wage earners, nga adunay usa ka milyon nga target nga benepisyaryo sa katapusan sa tuig.
Samtang sa pagtubag sa mga kabalaka nga ang ubos nga presyo sa bugas makadaut sa mga mag-uuma, gisubli ni Marcos nga adunay mga panalipod aron mapugngan ang pag-ubos sa presyo sa humay o gitawag nga unhusked rice.
Matod niini ang National Food Authority (NFA) gimanduan nga mopalit og basa nga humay sa P18 matag kilo ug dry palay sa P19 ngadto sa P23 matag kilo.
Gitumbok usab ni Marcos ang padayon nga paglusad sa mga pasilidad sa pagproseso sa bugas ug mga dryer sa tibuok nasud aron mahatagan ug gahom ang mga mag-uuma sa pagtipig ug pagproseso sa ilang ani, imbes nga pugson nga ibaligya sa mga negosyante sa ubos nga presyo.
