CEBU CITY- Ilusad na sa dakbayan sa Sugbo ang P20-per-kilo rice program sa Marcos administration atubangan sa City Hall nga pangulohan sa Department of Social Welfare and Development sa Central Visayas (DSWD-7), sa pakigtambayayong sa Department of Agriculture, Food Terminal Inc. (FTI), ug accredited Kadiwa retailers ning Huwebes, Hulyo 31.
Apan, anaa lang sa 52 ka pilot beneficiaries gikan sa Cebu City ug Talisay ang makadawat sa subsidized rice ubos sa Walang Gutom 2027: Food Stamp Program, nga magsilbi nga test run sa dili pa ang citywide rollout.
Matod ni Mayor Archival nga ang siyudad nag-finalize na sa pormal nga partisipasyon niini sa programa ug nagsusi sa draft Memorandum of Agreement (MOA) gikan sa FTI, nga magtugot sa lokal nga kagamhanan sa pagsugod sa pagbaligya og bugas sa tag P20 matag kilo ngadto sa mas daghang residente sa umaabot nga mga semana.
Hinungdan nga nipadayag kini og kalipay ug suporta sa programa ug andam kini nga motabang.
Gikompirmar usab ni Archival nga nadawat na sa buhatan ni Konsehal Jun Alcover ang draft MOA ug nagtrabaho na kini sa pagtakda og tigom sa mga representante sa FTI aron mahuman ang partnership.
