MANDAUE CITY-Mokabat sa P3.1 bilyones nga kantidad sa infrastructure projects ang ipatuman sa dakbayan sa Mandaue karong tuiga.
Nibutyag si Rep Emmarie Lolypop Ouano-Dizon sa lone district sa Mandaue nga nigahin siya og P1.9 bilyones alang sa flood mitigation ug drainage improvement programs sa dakbayan sa Mandaue.
Sa P1.9 bilyones nga flood mitigation project, P1.082 bilyones ang gigahin alang sa flood mitigation programs sa nagkadaiyang bahin sa Butuanon River, samtang P250 milyones ang gigahin alang sa Mahiga Creek.
P160 milyones ang budget sa pagbaha sa Sitio Orel ug Santo Niño Village sa Barangay Banilad og ang ang budget nga gigahin sa pagbaha sa Tingub Creek kay P50 milyones, samtang ang susamang imprastraktura sa Basak Creek makakuha og P150 milyones, ug laing P70 milyones alang sa Tipolo Creek.
Dugang P160 milyones ang gigahin alang sa road improvement nga dunay drainage facilities sa nagkadaiyang barangay sa Mandaue, lakip na ang P41 milyones nga proyekto duol sa University of Cebu Lapu-lapu Mandaue (UC-LM) area.
Gawas sa flood control, ang ubang mga proyekto gitakda usab nga ipatuman karong tuiga, sama sa Marcelo Fernan Bridge retrofitting ug rehabilitation nga mokabat sa P180 milyones, water pump stations sa barangay Casili, Ibabao, Tingub, ug Maguikay nga adunay kinatibuk-ang P48 milyones, ug multi-purpose buildings, ug uban pa.
Sa miaging tuig, mikabat usab sa P2.9 bilyones nga kantidad sa mga proyekto ang napatuman sa dakbayan, lakip na niini ang P1.3 bilyones nga flood mitigation project, “storm asphalt” sa pipila ka barangay sa dakbayan, ug uban pang infrastructure projects nga wala pa mahuman kaniadto.
