CEBU – Nasikop sa gipahigayon nga follow-up operation sa mga otoridad ang usa ka High Value Individual (HVI) sa Sitio Sta. Lucia, Barangay Poblacion, lungsod sa Consolacion, Cebu.
Giila ang dinakpan nga si Kirby Abanilla, 37 anyos, ug lumad nga taga Concepcion St., Barangay Suba, dakbayan sa Sugbo.
Gisaysay ni Cebu City Police Office Director Police Colonel Engelbert Soriano nga gipahigayon nila ang operasyon kauban ang City Drug Enforcement Unit (CDEU), City Intelligence Branch (CIB), ug Regional Intelligence Division (RID) 7, human nga gisuka sa ilahang unang nasikop nga usa ka regional level high value individual.
Nakuha gikan sa posisyon ni Abanilla ang lima ka kilo ug 50 gramos nga shabu nga gisulod ug Chinese tea bag, kung diin nagkantidad kini ug kapin P34 million.
Una niini, nakuha sa mga otoridad ang tulo ka kilo nga shabu gikan sa regional level high value individual nga si Elmer Bas Gallarde, taga JM Basa St., Barangay Sawang Calero, Cebu City, kung diin mikantidad kini ug P20.4 million.
Sa kinatibuk-an, nakakuha ang mga otoridad sa duha ka anti-illegal drug operation ug walo ka kilo nga shabu nga mukabat ug kapin P56 million.
