CEBU CITY – Miabot na sa kapin P6-milyones nga balor sa ginadiling drugas ang nasakmit sa kapulisan atol sa managlahing mga buybust operations sa dakbayan sa Sugbo.
Giimbestigar pa sa kapulisan ang tinubdan sa nasakmit nga kapin P3-million nga balor sa drugas gikan sa usa ka lalaki atol sa buybust operation sa Sitio Bohol, Brgy. Duljo Fatima, sa nahisgutang dakbayan.
Nasikop sa mga sakop sa kapulisan ang newly-identified subject nga si Orsolino Alfafaro, 40 anyos, ug nagpuyo sa Basak Pardo, sa susamang dakbayan.
Matud sa hepe sa Mambaling Police Station nga si Police Capt. Renz Talosig, nga 3 ka semana nang gipaubos sa surveillance sa wala pa nahitabo ang maong operasyon.
Nakuhaan si Alfafaro og tunga sa kilo sa gidudahang shabu nga mikabat og P3,434,000.
Dugang pa ni Police Capt. Talosig, nga nakasuhan ang maong dinakpan sa kaso nga homicide niadtong 2014.
Samtang nasakmit usab sa mga sakop sa Drug Enforcement Group (DEG) – Visayas ang giingong drug group member nga si Mike Celosia alyas “Chikoy” ug 18 anyos ang pangidaron niini.
Kini human nga nakuhaan ang dinakpan og 400 grams sa shabu nga mikantidad og P2,720,000.
Matud sa hepe sa DEG-Visayas nga si Police Lt. Col. Glenn Mayam nga anaa sa drug watchlist si alyas Chikoy ug magkontakay kini sa usa ka piniriso sa Cebu City Jail kung adunay buyer. Nasayran nga maka-dispose si alyas Chikoy og 1 ka kilo sa shabu matag semana.
Nasikop usab ang laing drug target nga si Jose Alex Roble, 20 anyos, ug usa ka ALS student, atol sa laing buybust operation sa Brgy. Carreta, sa dakbayan sa Sugbo. Nakuhaan si Roble og 50 grams sa shabu ug mibalor kini og P340,000.
Mi-awhag si Mayam nga hunungon ang pagkalambigit sa transaksyon sa ilegal nga drugas alang sa kaluwasan ug kahapsay sa ilang kinabuhi.
Pasakaan ang mga subject og kasong kalapasan sa Republic Act 9165 kon Comprehensive Dangerous Drugs Act of 2002.
