Gikatakdang makadawat og laing prestihiyosong pasidungog ang boxing legend ug People’s Champ nga si Manny Pacquiao human i-anunsyo nga kabahin siya sa Class of 2027 sa U.S. National Boxing Hall of Fame.
Ang pahibalo gihimo atol sa 3rd Pacquiao-Elorde Awards Night nga gipahigayon sa Manila, diin gikumpirma ni Eric Schmidt ang maong pag-ila.
Sa wala pa kini, naapil na usab si Pacquiao sa International Boxing Hall of Fame Class of 2025 sa Canastota, New York, kauban ang ubang Pilipinong boxing legends nga sila si Gabriel Elorde ug Pancho Villa.
Si Pacquiao nailhan nga nag-inusarang eight-division world champion, nga nakatigom og 12 major world titles ug nakig-atubang sa 22 ka world champions sa tibuok niyang propesyonal nga karera.
Sa usa ka sulat gikan sa National Boxing Hall of Fame, si Pacquiao gitawag nga “Main Event” inductee alang sa Class of 2027. Gidayeg usab ang iyang kontribusyon dili lamang sa boksing kondili apil na ang iyang serbisyo sa nasud.
Gilauman nga motambong si Pacquiao sa seremonya sa induction nga ipahigayon sa Abril 25, 2027 sa Quiet Cannon sa Montebello, California.
