Mihimo og kasaysayan si Lea Salonga human siya gipasidunggan og Hollywood Walk of Fame star niadtong Sabado, Setyembre 5, oras sa Pilipinas.
Nahimo siyang unang Pilipino nga nakadawat og Hollywood star, nga gipaila sa Hollywood Boulevard, atubangan sa Hollywood Pantages Theatre sa Los Angeles, California.
Sa iyang pakigpulong, gipasigarbo ni Salonga ang iyang pagka-Pilipino ug gipaambit ang iyang panaw isip artista, lakip ang mga hagit sa pagsugod sa iyang karera.
Gipasiugda usab niya ang mas dakong representasyon sa mga Pilipino ug mga Asyano sa Hollywood ug nanghinaut nga ang iyang kalampusan mahimong inspirasyon sa mga batan-ong Pilipino nga nagdamgo nga makasulod sa industriya.
Si Salonga nailhan sa iyang papel isip Kim sa “Miss Saigon” ug sa iyang pagkanta alang sa mga karakter nga si Princess Jasmine sa “Aladdin” ug Mulan sa “Mulan.”
Gihulagway niya ang pagkadawat sa Hollywood star isip usa ka talagsaong panaw ug mipahayag nga daghan pa siyang gustong maabot sa iyang karera.
