CENTRAL VISAYAS- Gilauman nga maminusan na ang pag-uwan sa Sugbo sulod sa mosunod nga duha ka semana samtang anam-anam na nga mabati ang epekto sa El Niño.
Kini ang gipadayag ni Engr. Oscar Tabada, kanhi PAGASA Visayas Director nga bisan adunay panagsa nga pag-uwan sa unang semana sa Agosto, dili na kini sama sa kusog nga ulan nga nakaresulta sa pagbaha sa daghang bahin sa Sugbo sa miaging mga semana.
Matud ni Tabada, base sa mga weather models, moubos ang tsansa sa pag-uwan sulod sa sunod nga duha ka semana ug mopuli ang mas init nga panahon samtang padulong ang nasud sa mas mabating epekto sa El Niño, nga gilauman nga mosugod sa Setyembre hangtod Oktubre.
Gipasabot usab niya nga bisan adunay monsoon break, mahimo gihapong mobaskog ang hangin tungod sa impluwensya sa Typhoon Dolphin, nga anaa sa halayong amihanang bahin sa Luzon ug walay direktang epekto sa Pilipinas. Dugang pa niya, adunay namuong low pressure area (LPA) apan wala kini milahos ug wala mahimong bagyo.
Tungod niini, giawhag ni Tabada ang publiko, ilabina ang mga mangingisda ug mga mobiyahe pinaagi sa dagat, nga dili magpakakumpyansa ug kanunay nga subayon ang mga weather advisories sa dili pa molawig.
Samtang, giingon sa kanhing opisyal sa PAGASA nga dili lamang ang gidaghanon sa ulan ang hinungdan sa nagkagrabeng pagbaha sa Sugbo, kondili usab ang padayon nga pagputol sa mga kahoy ug pagpatag sa kabukiran alang sa mga development projects.
Matud niya, tungod sa pagkawala sa mga kahoy nga natural nga mosuyop sa tubig-ulan, mas dali nang modagayday ang tubig ngadto sa ubos nga mga lugar ug moresulta sa pagbaha bisan dili kaayo kusog ang ulan.
Busa, iyang gihangyo ang mga lokal nga panggamhanan ug mga developers nga hatagan og dakong pagtagad ang pagpanalipod sa kinaiyahan ug ang husto nga pagdumala sa kalikupan aron maminusan ang peligro sa pagbaha sa umaabot.
