CEBU CITY- Gipasabot ni Engr. Oscar Tabada, kanhi Visayas Director sa PAGASA, nga ang haze nga nasinati karon sa nagkadaiyang bahin sa Sugbo resulta sa kombinasyon sa taas nga temperatura, grabeng kainit, kakulang sa ulan, ug pagtaas sa polusyon sa hangin.
Matod niya, tipikal kini sa dry season diin halos wala’y ulan ug mosaka ang kainit sa palibot, hinungdan nga mas mabati ang haze ilabi na sa mga urban nga lugar sama sa Sugbo.
Sa pakighinabi sa Bombo News team, iyang gipasabot nga sa mga bulan sa Abril ug Mayo, kasagarang mosaka ang temperatura samtang mokunhod ang ulan, nga nagresulta sa pagtipon sa mga pollutant sama sa aso gikan sa sakyanan, sigarilyo, ug uban pang hugaw sa palibot.
Iyang gipasabot usab nga ang gagmay nga partikulo o abog sa hangin dili dayon makasaka sa taas nga atmospera tungod sa hinay nga paglihok sa hangin, busa mopundo kini sa ubos nga lebel ug mahimong makita isip haze o murag gabon.
Dugang pa, ang kakulang sa ulan nakapugong sa natural nga paglimpyo sa hangin, kay wala kini’y igong pag-ulan nga makadala sa mga hugaw paubos sa yuta. Tungod niini, nagpadayon ang pagbug-at sa kahimtang sa hangin sa pipila ka lugar, lakip ang Cebu City ug ubang southern areas.
Gipunting usab ni Tabada nga bisan pa sa presensya sa amihan, dili kini igo ang kusog aron mapalapta ang natipong polusyon, hinungdan nga magpabilin ang kabaga sa hangin ilabi na sa kagabhion ug kaadlawon.
Tungod niini, iyang gidasig ang publiko nga mag-amping, ilabi na kadtong adunay kondisyon sa baga sama sa hika, ug likayan ang mga kalihokan nga makadugang sa polusyon sa hangin.
Nagpahimangno usab siya nga kung magpadayon ang init nga panahon ug kakulang sa ulan, posible pa nga mosamot ang haze sa mga mosunod nga adlaw.
