CEBU CITY-Nipasidaan ang Philippine Atmospheric Geophysical and Astronomical Services Administration sa Mactan (Pagasa-Mactan) sa publiko nga magmabinantayon sa pagpaambit sa mga unverified ug peke nga weather updates taliwala sa mga hulga sa dili maayong panahon tungod sa presensya sa low-pressure area (LPA) sa amihanang sidlakan sa Mindanao.
Kini mahitungod nga ang Pagasa-Mactan nakadawat og mga taho sa mga post nga nikatap sa social media kabahin sa usa ka ‘kusganon nga bagyo’ nga moagi sa Kabisay-an karong semanaha.
Tungod niini, ang ahensya niingon sa publiko nga bantayan ang weather updates gikan sa mga opisyal nga tinubdan sama sa Pagasa.
Matud pa sa Pagasa-Mactan, posible nga makasulod kini sa Philippine Area of Responsibility (PAR) sa ulahing Miyerkules sa gabii o karung Huwebes, Nobyembre 16.
