Nagtuo ang kampo ni Bise Presidente Sara Duterte nga ang impeachment trial mahimong mapamubo kon hingpit nga ibasura o bawion sa prosecution panel ang Article 3, nga naghisgot sa mga alegasyon sa bribery o kickback batok sa mga opisyal sa Department of Education.
Sumala ni Defense Deputy Spokesperson Atty. Justin Nicol Gular, ang ilang habig naghulat pa sa katapusang desisyon sa prosekusyon kon bawion ba o ipadayon ang maong mando sa dili pa sila mopagawas og dugang opisyal nga pahayag.
Gipaniguro usab ni Gular nga respetuhon sa depensa ang bisan unsang desisyon sa prosekusyon ug andam sila nga i-adjust ang ilang legal nga pagpangandam basi sa desisyon nga mogawas.
Dugang pa, ang kampo ni Bise Presidente giingong andam usab sa gisugyot nga mga probisyon gikan sa prosekusyon panel. Apan, kinahanglan una nilang susihon ug tun-an pag-ayo ang mga probisyon niini sa dili pa mohatag sa ilang opisyal nga tubag.
Hinuon, gipasalig sa legal team nga andam sila alang sa mas taas nga mga sesyon sa pagsulay, lakip ang tibuok adlaw nga mga hearing, aron masunod ang gipaabot nga busy nga calendar ug schedule sa Senado.
