CEBU – Niresulta sa pagdahili sa yuta, pag-apaw sa mga tubig sa sapa, pagbaha hangtod sa hawak sa nagkadaiyang bahin sa Metro Cebu, ang pagbunok sa uwan gahapong adlawa Biyernes sa gabii, Sept. 9, 2022.
Labing minos duha ka managlahing insidente sa pagdahili sa yuta ang gitaho sa Sugbo, ang una didto sa Sitio Batang-Batang sa Barangay Sudlon 1 sa dakbayan sa Sugbo ug ang nahitabong pagdahili sa yuta sa Sitio Langoyon sa Barangay Manipis, dakbayan sa Talisay.
Hinuon, wala’y gitaho ang mga otoridad nga adunay kaswalti o naangol tungod sa pagdahili sa yuta.
Samtang ang dalan sa Sitio Langoyon sa Barangay Manipis, dakbayan sa Talisay, maagian na mga alas 6 sa gabii kay nahuman na ang clearing operations.
Aduna usab usa ka 10-wheeler truck ang nalubog sa baha sa likod nga bahin sa Pedro Calungsod Church sa Barangay Pulangbato, dakbayan sa Sugbo.
