Dili pa panahon aron gamiton sa Pilipinas ang Mutual Defense Treaty (MDT) uban sa Estados Unidos taliwala sa mga naglutaw nga istruktura nga gitukod sa China sa Bajo de Masinloc.
Kini ang gipahayag ni Atty. Jay Batongbacal, usa ka eksperto sa maritime law.
Gipasabot ni Batongbacal nga tungod kay ang maong isyu naglambigit sa soberanya ug teritoryo, dili kini basta-basta nga madala ngadto sa mga internasyonal nga korte.
Bisan pa man niini, gipasidan-an niya ang gobyerno nga ang gihimo sa China usa ka seryosong hulga sa seguridad sa nasod.
Kon molampos ang China sa paghimo sa maong dapit nga usa ka permanente nga base militar, mameligro ang Pilipinas sanglit 120 nautical miles lamang kini ang gilay-on gikan sa Luzon.
Matud ni Batongbacal, sa dili pa gamiton ang MDT o pwersa militar, kinahanglan una nga tun-an sa gobyerno kon angay ba kining isipon nga usa ka “act of aggression” o dayag nga pag-atake sa China.
Sa pagkakaron, dako pa ang tsansa nga matangtang ang maong mga istruktura pinaagi sa diplomasya.
Iyang gipasiugda nga ang tubag sa nasod kinahanglang mabinantayon apan maisigon gamit ang balaod, diplomasya, ug kooperasyon sa mga kaalyado sa dili pa mosangpot sa gubat ang sitwasyon.
