Gibutyag ni Atty. Rameses Villagonzalo, usa ka criminal law expert ug ICC accrideted lawyer, nga mamahimo gihapong nakalapas sa amended Anti-Hazing Act of 2018 o ang RA 11053, ang nahitabo nga insidente sa Dipaculao, Aurora nga gikamatay sa 2 ka players sa Ateneo de Manila University nga sila si Divine Adili ug Rene Baterbonia.
Matud niini nga aduna gihapon kini kalapasan sa mismong salaod gumikan kay bisan paman walay pormal nga fraternity o sorority ang mismong grupo nga nagpahigayon sa maong aktibidad, nakalapas gihapon kini gumikan sa elemento nga nakita ug nakalatid sa balaud, diin base sa imbestigastyon sa Criminal Investigation and Detection Group (CIDG) nga nakahatag ug physical and emotional distress sa mga players ang pagpahigayon sa maong Team Building training.
Gipasabut usab ni Atty. Rameses, nga wala pa hingpit makasuhan ang mismong mga respondents gumikan kay rekomendasyon pa kini gikan sa CIDG, apan magdepende kini sa ipasakang kaso sa public prosecutor nga nagkupot sa imbestigasyon.
Dugang usab niini nga posibleng mapasakaan ug kasong kriminal si ADMU Coach Tab Baldwin sa mismong panghitabo kung lig-on ang prima facie nga makita sa prosekyusyon ug mahimong masuspinder ang iyang mga prebilihiyo lakip na ang passport ug working permit niini isip langyaw.
Lakip usab nga posibleng mapasakaan og kasong criminal negligence ang pamunoan sa ADMU bisan paman nga gilimod niini ang kahibalo sa nahitabo sa Dipaculao Aurora, niadtong Hunyo 8.
