Hagit karon sa mga nagkadaiyang Barangay sa Dakbayan sa Mandaue ang pagkolekta sa mga basura gumikan sa limitadong oras niini sa pagkolekta, subay sa pagdahili sa Landfill sa Binaliw 1 niadtong Enero 8.
Matud ni Dante Borbajo, ang Presidente sa Associaton of Barangay Council sa Dakbayan sa Mandaue, nga nagpahigayon sila og scheduling sa pagkolekta sa mga basura matag barangay, aron usab dili magdungan ang 27 ka mga barangay sa paglabay sa transfer station.
Sigon ni Borbajo, nga magdepende nalang sa mga barangay kung unsay paagi ilang buhaton aron mas mapadali ang pagkolekta og paglabay sa basura, hinungdan nga nagpahigayon sila og by cluster aron usab nga dili makamugna og katrapik.
Nagpahigayon gihapon ang dakbayan og segregation sa mga nagkadaiyang basura gumikan kay ang maong transfer station alang lang sa composting area.
Gihimug-atan usab ni Borbajo nga mahinungdanon gayud ang pagbuwag-buwag sa mga basura aron dili makuwestiyon ang kagamhanan sa buhatan sa Department of Environment and Natural Resources.
Gipaningkamotan usab sa kagamhanan sa Dakbayan nga makakolekta sila sa basura bisan kaduha lang ka higayon sa matag adlaw gumikan kay kutob lang sa 6 ka oras ang limit niini.
