Gikuwestiyon ni Navotas City Rep. Toby Tiangco ang paglahap nga gihimo sa House of Representatives sa National Disaster Risk Reduction and Management Fund (NDRRMF) sa proposed national budget alang sa tuig 2027.
Gisaway niini ang pagtibhang sa pondo, ug gipunting nga ang nasud posibleng mag-atubang sa mga epekto sa El Niño.
Sa usa ka interbyu, gikuwestiyon ni Rep. Tiangco ang pagkunhod sa pondo alang sa Disaster Risk Reduction—o pondo alang sa mga kalamidad—og dul-an sa P10 Billion; gikan sa gisugyot nga P45.67 Billion, nahimo na lang kining P36.17 Billion.
Gipadayag niya nga ang pagkunhod gihimo nga walay pagpasabot, ug nga wala usab mahatagi og higayon nga makapangutana atol sa gitawag nga “period of interpellation.”
Matod niya, adunay mga paningkamot nga ibalik ang pondo, apan gisalikway kini sa House, nga nagpatunghag mga kabalaka mahitungod sa”transparency” sa maong proseso.
Gihisgotan usab niya ang kakuwang sa pag-uswag sa House mahitungod sa “Citizen Access and Disclosure of Expenditures for National Accountability (CADENA) Act”—usa ka balaodnon nga aduna usab susamang bersyon sa Senado, nga gipaluyohan ni Sen. Bam Aquino.
Ang maong gisugyot nga balaodnon nagtumong sa pagpalig-on sa katin-aw ug pag-monitor sa paggasto sa gobyerno, ilabi na kon bahin sa pondo sa publiko.
Pinaagi sa paggamit sa blockchain technology, masiguro niini nga ang mga dokumento nga may kalabotan sa badget, mga proyekto sa gobyerno, ug uban pang mga butang magpabilin nga ma-access o makita sa publiko.
