CEBU CITY — Gihangop sa Department of Education (DEPED)-7 ang lakang sa Cebu Provincial Government nga ihunong na ang mga online classes taliwa sa nasinating hagit tungod sa COVID-19.
Kini human nga nimando si Governor Gwendolyn Garcia nga sirad-an ang mga internetan aron dili na magtapok ang mga tinun-an ug striktong obserbahan ang social distancing.
Matud ni DEPED-7 Director Dr. Salustiano Jimenez nga wala pay online platform ang klase sa mga public schools ug paingon na kini panahon sa closing.
Dugang pa niini nga igo nang nahuman ang 180-day non-negotiable contact time tali sa magtutudlo ug mga tinun-an sulkod sa tunghaan maong dili kaayo apektado ang tingklase ning nasinating hagit.
Gitataw usab ni Jimenez nga dili apektado ang sweldo sa mga magtutudlo subay na sa kasamtangang sitwasyon ug mahimo pang magpadayon ang pagkumpleto sa gikinahanglang requirements sa sulod sa ilang panimalay.
Mipadayag usab ang regional director nga dili apektado ang ting-abli sa klase kun ugaling makalingkawas ang nasud sa krisis tungod sa coronavirus. (gn)
