CEBU – Mahimong tugotan ang pagpanaygon sa kabalayan samtang wala pay lagda gikan sa kagamhanan sa siyudad sa Sugbo nga magdili niini.
Apan hugot nga gidili ang pagpanaygon sa mga bata sa mga sakyanan diha sa kadalanan, labina sa pampublikong lugar.
Sumala ni Police Lieutenant Colonel Maria Theresa Macatangay, information officer sa Cebu City Police Office (CCPO), nga walay balaod nga nagdili sa pagpanaygon bisan kon una sila nga niawhag nga dili lang una kini buhaton atol sa pagsulbong sa mga kaso sa coronavirus disease 2019 (Covid-19) duha ka tuig na ang nakalabay.
Karon nga giluagan na ang restrictions sa siyudad sa Sugbo, dili na pugngan ang mga manaygunay, apan kinahanglan nga tumanon nila ang health protocol sama sa pagsul-ob kanunay sa face masks bisan kon wala na pugsa ang katawhan nga mosul-ob niini kon naa sa bukas nga lugar.
Nipasabot si Macatangay nga anaa gihapon ang presensya sa virus ug kinahanglan nga mag-amping usab ang mga manaygonay sa pamasin sila ang makatakod o ba kaha sila ang matakdan kon mokompyansa.
