Gibisita ni Cebu Governor Pamela ‘Pam’ Baricuatro ang Cebu South Bus Terminal niadtong udtong bahin sa Marso 20 aron pagasutaon kung unsa na ang kalamboan sa pagpang asphalt-to niini.
Diin gikabutyag ni Ahmed Cuizon, ang pangu sa Cebu South Bus Terminal (CBST) ug Cebu North Bus Terminal (CNBT), nga anaa na sa 49.12% sa pagpang asphalt-to sa terminals sa Sugbo.
Atol sa eksklusibong pakighinabi sa Bombo Radyo Cebu kang Cuizon, siya mibutyag nga dul-an katunga na ang accomplishment sa kontraktor sa maong proyekto sa mga terminals, ug balikon kini sa kontraktor niini ugmag adlwa, Marso 23, aron tiwason ang trabaho ug ingun man ang pagpang fabricate sa mga puthaw.
Kahinomdoman nga gisugdan niadtong Marso 13, ang pagpang asphalt-to sa naasoyng Terminal, ug gibana-bana kining mahuman sulod sa 7 hangtud 10 ka adlaw, subay na nga kini, dugay na nga giplanohan.
Basi sa pamulong ni Cuizon sa lahing pakig interbyu kaniya sa Bombo Radyo Cebu, giasoy niya nga taud-taud nang nahatagan og “Notice to Proceed” ang kontraktor niini, apan wala diha-diha dayun nasugdan gumikan sa mga hagit sama sa pagbaha ug uban pang bati nga dagan sa panahon.
