Sa bug-at ang suliran sa basura nga gi atubang karon sa Dakbayan sa Sugbo, nagkinahanglan kini og malungtaron nga solusyon gawas lang sa matag tulo ka buwan nga “Citywide Cleanup” nga gipangulohan sa lokal nga kagamhanan.
Busa, nakahuna-huna og paagi si Mayor-elect Nestor Archival nga mangita og mga kompanya nga mamahimong mo palit sa mga plastic nga natigom sa bisan asang dapit, kay tumong niini nga makonhoran ang mga plastic nga basura.
Iyaha usab nga naasoy nga adunay proyekto kaniadto ang Kagamhanan sa Dakbayan sa Sugbo hain kaabag ang Japan International Cooperation Agency, nga naghatag og makina nga mogagmaygagmay sa mga plastik sa dili pa kini isulod sa sako, nga paliton og usa ka factory og semento.
Sa laing bahin, nahisgutan usab sa Mayor ang ka walay kooperasyon sa mga katahawhan, sa panahon nga mopahigayon og citywide cleanup ang mga empleyado sa City Hall ug mga volunteers, apan ang mga tawo mismo dili gani motabang, manan-aw lang.
Mao nga sa iyahang mga pulong, nag-awhag siya sa mga katawhan nga ipahimutang og tarung ang mga basura, dili ilabay sa imburnal o daplin sa dalan, ilabi na sa mga panahon nga dili makuha sa garbage truck.
Tumong usab sa Mayor nga makig-alayon sa nagkadaiyang barangay sa Dakbayan sa Sugbo mahitungod sa pagpangolekta sa basura, ug ang City Government na ang mangita og paagi nga makuha kini ug mabaligya. | Bombo Irene Ardiente
