PROVINCE OF CEBU- Gimando ni Cebu Governor Pamela Baricuatro ang pagpasuspenso sa tanang quarry-related activities lukop sa Probinsya Sugbo sulod sa 30 ka adlaw.
Gipahigayon ang pagpasuspenso aron masugdan na ang komprehensibong pagtuki sa mga environmental and extraction-related permits, diin lakip sa suspension ang tanan nga Quarry Permits, Sand and Gravel Permits, ug Special Disposal Permits nga gi-issue sa Cebu Provincial Government.
Matud pa sa gobernadora, kini usa ka lakang aron masiguro nga ang tanang mga operasyon sa quarry magpadayon sa mga husto ug tukma nga pamalaod aron makaprotektahan ang kalikupan.
Wala usab gibutyag sa buhatan sa gobernadora ang mga pangalan ug lokasyon sa mga apektadong operator sa quarry permits ug special disposal permits.
Apan basi sa 2023 directory of operating mines and quarries gikan sa Mines and Geosciences Bureau (MGB) 7, aktibo ang quarry operations sa Asturias, Balamban, Bogo City, Carmen, Carcar City, Compostela, Consolacion, Dalaguete, Danao City, Ginatilan, Malabuyoc, Medellin, Minglanilla, Naga City, Pinamungajan, Ronda, San Fernando, Tabogon, Talisay City, Toledo City ug Tuburan. | Bombo Nathaniel Sandoval
