MANDAUE CITY-Gilantaw sa kapulisan sa dakbayan sa Mandaue ang tanang anggulo sa nahitabung pagpanulis sa duha ka jewelry store, usa ka pawnshop ug usa ka money changer sulod sa J Center Mall kagabii.
Sa eksklusibo nga pakighinabi sa Bombo Radyo Cebu kang Police Colonel Jonathan Abella, ang director sa Mandaue City Police Office (MCPO) nga daghan sila karun ug gisubay, usa na niini ang inside job, ingun man nga miyembro sa sindikato ang mga tulisan.
Napanglantawan usab ni Col. Abella nga dugay nang gipanid-an sa maong grupo ang nahisgutang mall kung diin pila na kahigayun nga misulod ug nagpahigayon ug surveillance.
Gipahibalu sa police director nga basi sa CCTV footage makita nga anaa sa dili mu ubos 15 ka mga lalaki ang suspek sa maong pagpanulis. Giklaru usab ni Col. Abella nga walay shootout nga nahitabo sulod sa mall ug giingung gihapak sa usa sa mga suspek sa dala niini nga armas ang gwardya hinungdan nga kini usa sa mga angol sa maong insidente ug anaa pa kini karun sa tambalanan.
Gani, gitataw sa police official nga wala’y bisan usa sa mga gwardya ang naka-react sa nahisgutang pagpanulis.
Sa pagkakarun, padayun ang imbestigasyon sa MCPO kalabut na maong panghitabo. (SBR)
