Giduso pag-usab ni Senador Robinhood Padilla ang dinaliang pagpasar sa balaodnon nga Reserve Officers’ Training Corps (ROTC) Act dungan sa pagsaulog sa Adlaw sa Kagawasan gahapong adlawa, Biyernes, Hunyo 12.
Gipasabot sa senador nga ang nahitabong magnitude 7.8 nga linog sa Mindanao nagpakita sa dako nga panginahanglanon nga makabaton og mga disiplinado ug bansay nga mga lungsoranon nga makatabang sa pagbakwit, first aid, pagpangita ug pagluwas, ug pagtubag sa panahon sa katalagman.
Ubos sa Senate Bill No. 617, ipailalom sa mandatory nga batakang pagbansay sa ROTC ang mga tinun-an sa kolehiyo ug mga tunghaan sa teknikal-bokasyonal aron mapalig-on ang kahandaan sa nasod batok sa mga kalamidad ug uban pang mga dinalian nga sitwasyon.
Gisiguro sa senador nga ang maong ROTC Act wala lamang gihimo alang sa nasodnong depensa, kondili alang usab sa paghulma og mga responsableng lungsoranon nga andam moserbisyo ug motabang sa panahon sa seryosong sakuna.
